Málfrelsi, skoðanafrelsi, raunveruleiki, fullorðinsleikur og djöfullinn

Hér er annað myndskeið með hedónistanum Larry þar sem hann tjáir sig um tilganginn með reglum um tjáningarfrelsi. Hann er kannski enginn íþróttaálfur, en mikið hreifst ég af myndinni um hann og ræðunni þar sem hann birti á víxl ógeðsmyndir úr stríði af dánu fólki og ámóta sorg og hinsvegar af sætum, brosandi stelpum að striplast. Hvort er verra? Hverju eigum við að berjast gegn?

Ég hef lesið af bloggsíðum sumra feminsta (nb. ég kalla sjálfa mig feminista) að þær eru margar óðar og æfar yfir því að allt pornógrafískt efni er ekki "fallegt". Þar er ekki viðhaft pent mál í sambandi við stelpur sem taka þátt í leiknum. Þær eru kallaðar gærur og dræsur og ýmsum öðrum ópenum nöfnum. Þetta finnst sumum feministum agalegt enda ekki fallegt þegar fólk sýnir ekki hvort öðru virðingu. Við eigum að vera góð við hvort annað. Þær virðast því miður gleyma því að þetta er allt í plati. Að það er stór munur á leik og raunveruleik og jafnvel þó að þetta væri eitthvað sem ekki er tekið upp á vídjó og selt í búðir, þá er þetta samt sem áður kynlíf og innan þess ramma leyfir fólk sér oft að gera, upplifa og láta sig dreyma um hluti sem tengjast ekki raunveruleikanum (sjá t.d. Ísfólkið :) ). Sumar konur vilja hreinlega láta kalla sig allskonar skrítnum nöfnum þegar þær eru að dónast og eflaust vilja margar feministastelpur það líka. Þið sáuð nú rétttrúnaðargosann hann Byrgir og hvað honum fannst skemmtilegt þegar hann dró fyrir gluggann. Ha? Ná há bát ðatt?

Í raun ættu feministar sem berjast fyrir réttlæti, að láta kynlífsdálkinn afskiptalausan...í það minnsta þann sem telst löglegur og í lagi (og þá skiptir ekki máli hvar efnið er framleitt eða hvaða fantasíur eru framreiddar), og pæla frekar í öðrum aðgengilegri málum.

Að skamma menn sem RAUNVERULEGA eru að kalla konur ljótum nöfnum og meina það. T.d. menn sem koma konum í kvennaathvarf. Að skamma fjölmiðlafólk fyrir að reyna ekki að skapa jafnvægi milli karla og kvenna í birtingum. Að breyta nöfnum eins og ráðherra og flugmaður í einhver önnur jafnræðislegri nöfn og að reyna að vinna í því að svokölluð kvennastöf njóti meiri virðingar. Að orðatiltæki eins og "hleypur eins og stelpa" þurfi ekki að skiljast sem niðrandi, eða "keyrir eins og kelling"... og að jafnvel bara orðið "stelpa" skuli geta túlkast sem niðrandi.

Ekkert af þessu gengur út á neinn þykjustuleik. Þetta er raunveruleikinn og það leikur enginn vafi á að ekkert er í plati. En þegar það er verið að æsa sig og skammast yfir kvenfyrirlitningu í einhverjum þykistuleik þar sem allir eru samt sem áður samþykkir því sem verið er að gera (og fá kaup fyrir það) þá er svolítið verið að æpa út í vindinn.

Er það ekki?

Og annað.... Ég tel það í hæsta máta ólíklegt að klámmyndir leiði til þess að menn vilji út að nauðga. Þannig eru tildæmis ótrúlega litlar likur á því að Tyrkirnir (eða Alsírbúarnir) sem hingað komu árið 1627 og nauðguðu öllu sem hreyfðist, hafi verið að horfa á klám um borð í seglskipunum á leiðinni til Íslands. Nauðganir eru bara ofbeldisglæpir sem hafa tíðkast alla tíð og ekki bara hjá mannfólki heldur hjá allskonar skepnum sem aldrei hafa horft á klám. En þar sem við eigum að heita menn en ekki dýr þá væri vitanlegra æskilegra að við næðum að hemja og stjórna öllu dýrslegu eðli... það stendur í boðorðunum 10...en því miður tekst það bara ekki alltaf. Sumir verða bara alltaf nær því að vera dýr en menn -þó þeir gangi í fötum og eigi gemsa.

Þetta er samt eitthvað svo fyndið. Þegar kirkjan var að komast til valda var ráðist af kappi gegn hverskonar hedónisma og náttúrutrú. Andstæðingurinn fékk endanlega mynd sína frá útliti Pans. Skógarguðsins sem var geit að neðan og hafði horn á hausnum. Meira dýr en maður. Lifði fyrir kynlíf, drykkju og sprell. Var kallaður djöfullinn.

Þegar ég var unglingur voru einhverjir krakkar í hóp sem kallaði sig Pan hópinn. Þau sýndu undirföt á skemmtistöðum og fóru í leðjuslag. Það var fjallað um þau í fjölmiðlum eins og einhverja satanista og djöfladýrkendur. Þetta þótti alveg hræðilegt fólk. Gerspillt og snarruglað. Samt fór það ekki einu sinni úr að ofan... og þetta var fyrir um tuttugu árum síðan. Ha?

Það er gaman að þessu...

Athugasemdir

[Hrafnhildur (IP-tala skráð) 27.2.2007 kl. 07:58]

Þarna komstu með góðan punkt. Mér finnst stundum eins og femínistarnir séu svolítið að eltast við það sem þær halda að aðrir ætlist til að þær séu að berjast fyrir.... Mér fyndist svona trúverðugra ef þær væru meira áberandi í að berjast fyrir "raunverulegu" hlutunum eins og þú kallar þá, í staðinn fyrir að arga á leikara og heimta að guli kallinn á götuljósum sé settur í pils.... það finnst mér einfaldlega bara nöldur og grafa undan trúverðugleika hjá þeim.

Krummi 

[Óli Kristján (IP-tala skráð) 27.2.2007 kl. 10:55]

Frábær pistill. Vann eitt sinn sumarlangt með manni sem verið hafði í Pan-hópnum. Hann var nú ekkert að auglýsa það. Frábær náungi sem sauð fyrir mig nokkra lítra af gambra í forláta vakúmgræjum sem hann hafði komið sér upp.  Kv. ÓKÁ.

[maggabezt (IP-tala skráð) 27.2.2007 kl. 15:22]

Já Krummi... Sko... þetta með karlinn í götuljósinu. Hann mætti alveg vera kerling. Konur eru nefinlega oft einhver aukastærð og mikið af þessu er svo subliminal. Þ.e. við tökum ekki alveg eftir því í daglegu tali eða lífi, þó að staðreynd málsins sé samt þessi. Þannig finnst t.d. karlmönnum þeir vera að lesa kvennablað ef 50% af efni í tímariti er kvenmiðað og ef texti er skrifaður í karlkyni s.s. "Þú verður hamingjusamur, glaður og frjáls ef þú kemur i bankann til okkar" þá taka bæði kynin hann til sín. En  sé hann skrifaður "Þú verður hamingjusöm, glöð og frjáls" þá er þetta náttúrlega eitthvað sem er bara fyrir konur. Þannig geta konur oft verið einhverskonar skrítin aukastærð í lífinu. Við ályktum t.d. alltaf að allir sem keyra bíla séu "hann" af því "hann" er "ökumaður" og "maður" er náttúrlega karlmaður af því það segir enginn "maðurinn er að keyra bílinn" og á við að maðurin sé kona. Nei nei... svona er þetta... voða flókið og skemmtilegt og margt annað sem má byrja á að skammast yfir en að einhverjar hollenskar stelpur séu með tíkarspena að leika í klámmyndum sem eru hvort eð er bannaðar á Íslandi.